Saturday 16th July 2016

by Lionslayer

https://www.facebook.com/groups/mmUnicode/permalink/1310147958995707/
အရင်တစ်ခေါက်က ရေးထားတာလေးပျောက်သွားလို့ ပြန်ရေးလိုက်တယ်။
ဝီကီပီးဒီးယား ကိစ္စပါ။ ရှင်းသင့်တယ်ထင်လို့ရေးပါတယ်။ ဟိုလူ့ပြောသလိုလို ဒီလူ့ပြောသလိုလိုမဖြစ်အောင် နာမည်တွေ ထည့်လိုက်ပါတယ်။
ဝီကီးပီးဒီးယားကို ကိုဇော်သက်တို့စရေးကြတော့ ယူနီကုဒ်နဲ့ရေးလို့ လူနည်းပါတယ်ဆိုပြီး အိုကီးစံက ကမကထပြုလို့ ဇော်ဂျီနဲ့ရေးတဲ့ ဝီကီမြန်မာကို ရေးကြပါတယ်။ ဘန်ကောက်မှာ ဝီကီပီးဒီးယန်းတွေတွေ့ကြတော့ နှစ်ဘက်လုံး article တွေ မျှသွားအောင် convert လုပ်ပြီးထည့်ကြမယ်လို့ သဘောတူကြပါတယ်။ ဝီကီမြန်မာရဲ့ အဓိက contributor တွေဖြစ်တဲ့ ကိုဟန်ဇော်၊ ကိုမြင့်ကျော်၊ ကိုသင်ကာ၊ လဂွန်းအိမ်နဲ့ ကိုမေယာတို့ သူတို့ article တွေရော အဟောင်းတွေရော ဟိုဘက်ဒီဘက်စုံအောင် ပြောင်းကြပါတယ်။ နှစ်ဘက်လုံးမျှသွားတဲ့အချိန်မှာ ဆောင်းပါး ၃၀၀၀ ကျော် ရှိလာပါတယ်။ အဲဒီနောက်ပိုင်းမှာ organize လုပ်ရလွယ်တဲ့ မြန်မာဝီကီပီးဒီးယားမှာ ဆက်ရေးကြပါတယ်။ အခုတော့ ဆောင်းပါးပေါင်းလေးသောင်းနီးပါးရှိလာပြီး content များတဲ့ဆောင်းပါး တစ်သောင်းလောက်ရှိပါတယ်။
ဝီကီမြန်မာမှာပါခဲ့တဲ့ စည်သူအောင်က ဝီကီမြန်မာ wikimyanmar.co.cc ကို မြန်မာဝီကီပီးဒီးယားက ဒေတာတွေ “ခိုး”ထားပါတယ်လို့ ရေးပါတယ်။ သူ့အပေါင်းအသင်းတွေကလည်း share ကြဖွကြဖြန့်ကြပါတယ်။ ပြဿနာက ဝီကီမှာ ဘယ်သူက ဘယ်နှစ်ပုဒ်ရေးထားတယ် ဘယ်ဆောင်းပါးကို edit လုပ်ထားတယ်ဆိုတာ ပြန်ကြည့်လို့ ရနေတာပါပဲ။ ပြန်ကြည့်လိုက်တော့ စည်သူအောင်က discussion တွေတွေမှာ အများကြီးပြောထားပေမယ့် contribute တကယ်လုပ်ထားတဲ့ ဆောင်းပါးက ၃၀ ပဲရှိပါတယ်။ ဝီကီမြန်မာအခုမရှိတော့ပေမဲ့ မီဒီယာဝီကီ backup ဖိုင်ကို ဒီမှာ ပြန်ယူပြန်သွင်းပြန်ကြည့်နိုင်ပါတယ်။ https://archive.org/download/wiki-wikimyanmarcocc_wiki
ဝီကီနှစ်ခုလုံးမှာရေးထားတဲ့ဆောင်းပါးတွေက cc3 လိုင်စင်အောက်မှာ ရေးထားကြတာဖြစ်ပါတယ်။ မည်သူမဆို ကူးယူ ဖြန့်ချိ ပြင်ဆင်ခြင်းကို ခွင့်ပြုထားပြီးသားဖြစ်ပါတယ်။ ခိုးပါတယ်ဆိုလာတော့ ဒီလိုင်စင်ကိုများ မသိလို့လား မေးစရာ ဖြစ်ပါတယ်။ ဘာပဲဖြစ်ဖြစ် ဝီကီမြန်မာမှာ ဆောင်းပါးသုံးဆယ်ရေးပေးထားတဲ့အတွက် ကျေးဇူးလည်းတင်၊ အသိအမှတ်လည်း ပြုပါတယ်။

https://www.facebook.com/groups/mmUnicode/permalink/1329817370362099/
ကီးဘုတ်အကြောင်းပြောနေတာတွေ့လို့ပါ။ စတန်းဒတ်ကီးဘုတ်ဆိုရင် မြန်မာ၃ လက်ကွက်ကိုပဲ ညွှန်းပါတယ်။ ဝင်းဒိုးမှာပါလာသလို၊ လင်းနက်က xkb မှာလည်း ပါပါတယ်။ မိုဘိုင်းမှာတော့ ကီးအသစ်တွေ feature အဆန်းတွေ ထည့်ကြတာတွေ့ပါတယ်။ အင်ပွတ်က complex reordering ပြန်စီပေးတာ ရမရပေါ်မူတည်ပြီး သဝေထိုး ရှေ့ကရိုက်လို့ရတဲ့ဟာနဲ့ နောက်ကရိုက်လို့ရတဲ့ဟာရယ်လို့ ရှိပြန်ပါတယ်။ dummy proof ဖြစ်ဖို့ဆိုရင် auto suggestion နဲ့ sequence အမှားတွေ မှန်အောင်ပြန်ပြင်ပေးတဲ့ feature ပါလာဖို့ လိုပါမယ်။ ဖန်ခွက်မှာ ရေတစ်ဝက်လျော့နေတာလား ရေတစ်ဝက်ရှိနေတာလားကတော့ ကိုယ့်ရဲ့ အမြင်၊ ရပ်တည်မှုနဲ့ပဲ ဆိုင်ပါမယ်။

https://www.facebook.com/groups/mmUnicode/permalink/1309031569107346/
ယူနီကုဒ် လေး ငါး တွေအကြောင်း ပြောချင်လို့ပါ။ ဇော်ဂျီက ယူနီကုဒ်လေးကို အခြေခံထားတယ်ဆိုတာရယ် ယူနီသမားတွေက စိတ်ပုတ်ပြီး ယူနီကုဒ် ငါးမှာ ပင့်ရစ်ဆွဲထိုး တစ်ကွက်ရွှေ့လိုက်တယ်ဆိုတာရယ်။ ဇော်ဆရာတွေကလည်း အဲဒီအကြောင်းတွေ ခဏခဏပြောပါတယ်။ ယူနီကုဒ်ကိစ္စတွေ ဝင်မပြောတော့ဘူးတွေးပေမယ့် ရှင်းသင့်တယ်ထင်လို့ ရေးပါတယ်။
ယူနီကုဒ် 4, 4.1, 5.0 ထိ မြန်မာစာကုဒ်ပွိုင့်နဲ့ အန်ကုဒ်ဒင်းက တူတူပါ။ ပင့်ရစ်ဆွဲထိုးနဲ့အသတ်အတွက် ကုဒ်ပွိုင့်မရပါ။ ဝိရာမ ရယလဝ မော်ဒယ်နဲ့ ရေးရပါတယ်။ 5.1 မှာ ပင့်ရစ်ဆွဲထိုးနဲ့ အသတ်စရပါတယ်။
ဇော်ဂျီက ယူနီကုဒ် ၄ ကို အခြေခံတယ်ပြောရင် ဒီလူဖြီးနေပြီလို့ တွေးပါတယ်။ ဇော်ဂျီက မြစေတီကို အခြေခံတယ်ဆိုတာ အဲဒီခေတ်ကို မီလိုက်တဲ့လူတိုင်း သိပါတယ်။ http://www.myazedi.com/downloads/Issues1.swf . စာလုံးပုံပြောင်းတဲ့နည်းပညာကို မလုပ်တတ်သေးတာကြောင့် အဆင်ပြေသလို ကြုံရာနေရာမှာ ပင့်ရစ်ဆွဲထိုးနဲ့ အသတ် ပါဌ်ဆင့်တွေထည့်ပြီး အမြင်အတိုင်းစာရိုက်တဲ့ စနစ် လုပ်ပါတယ်။ ၅.၁ အဆိုပြုချက်နဲ့ ထုတ်တဲ့ယူနီကုဒ်ဖောင့် မြန်မာ၃ ထွက်မလာခင် ရက်ပိုင်းလေးမှာ ဇော်ဂျီကို လူသိရှင်ကြား “ယူနီကုဒ်ဖောင့်” လို့ ကြေငြာပြီး ထုတ်ပါတယ်။ အဲဒီအချိန်မှာ ဇော်ဂျီဆရာတို့လည်း ၅.၁ အတွက် လက်မှတ်ထိုးပြီးပါပြီ။ http://www.unicode.org/L2/L2006/06077-n3043r-myanmar.pdf ကြားထဲမှာ update အီးမေး thread တွေအကုန်လုံး ယူနီကုဒ်ကွန်ဆိုတီယမ်က public ဖွင့်ပေးထားပါတယ်။ follow up လုပ်နေရင် အကုန်သိနိုင်ပါတယ်။
ဇော်ဂျီကို အပ်ဒိတ်လုပ်လိုက်ရင် လာဖြစ်သွားမယ် ညာဖြစ်သွားမယ်ပြောနေသူတို့လည်း ဇော်ဂျီ၂၀၀၉ ဆိုတာ ကြားဖူးလိုက်ရဲ့လားလို့ မေးချင်ပါတယ်။ အတ္တတွေကြောင့် မြန်မာနဲ့ တိုင်းရင်းသားဘာသာတွေ အစမ်းသပ်ခံ အနှိမ်ခံဖြစ်နေတာကြာပါပြီ။ စိတ်ဝင်စားသူများ အင်ဖော်မေးရှင်းတွေကို ဆင်ခြင်နိုင်ဖို့ ဒီပို့စ်ကို တင်ပါတယ်။

https://www.facebook.com/groups/mmUnicode/permalink/1249977961679374/
ပြောလက်စနဲ့ အမုန်းခံပြီး ထပ်ပြောလိုက်ပါဦးမယ်။ ယူနီကုဒ်ဖောင့်ရေးတဲ့လူတွေ ပြင်တဲ့လူတွေ ကော်ပီရိုက်ကို လေးစားကြဖို့ပါ။ ဖောင့်ဖေ့စ်စုံတာ ကောင်းပါတယ်။ ဒါပေမဲ့ သူများခွင့်ပြုချက်မတောင်းဘဲ (မရဘဲ) ပရော်ဖက်ရှင်နယ်ဖောင့်တွေက ဂလစ်တွေကို ခပ်တည်တည်နဲ့ ယူသုံးနေတာ ရပ်ကြဖို့ တောင်းဆိုပါတယ်။ ခွင့်ပြုချက်မရဘဲ သုံးတယ်ဆိုတာ တနည်းပြောရရင် ခိုးတာပါပဲ။ ဇော်ဂျီကို Tahoma နဲ့ Arial တွေခိုးသုံးထားလို့ သူခိုးဖောင့်လို့ပြောသလို ယူနီကုဒ်ဖောင့်တွေလည်း တဖြည်းဖြည်းနဲ့ ဘာဖြစ်လာပြီလဲ စဉ်းစားကြဖို့ပါ။ ဖောင့်ဖေ့စ် မရေးနိုင်ရင် မရေးတတ်ရင် အသင့်ရေးပြီးသား ဧရာလို ပြန်သုံးခွင့်ပြုထားတဲ့ မြန်မာဖောင့်တွေ ရှိပါတယ်။ အင်္ဂလိပ်နဲ့ လက်တင်ဂလစ်တွေအတွက် အခမဲ့ သုံးခွင့် ပြုပြင်ခွင့် ပေးထားတဲ့ ဖောင့်တွေ ရှိပါတယ်။ ရှာသုံး၊ မေးသုံး၊ တောင်းသုံးကြပါ။ ငါ လုပ်တဲ့ဖောင့်လို့ ဂုဏ်ယူချင်ရင် ကော်ပီရိုက်ကို လေးစားကြပါ။ ဗြောင် ခိုးမစားကြပါနဲ့။
ယူနီကုဒ်သမားအများစုက ယူနီကုဒ်တိုးတက်ရေး နှောင့်နှေးမှာစိုးလို့ထင်ပါတယ်၊ ဘာမှ မပြောကြပေမဲ့ ကျွန်တော်ကတော့ မနေနိုင်လို့ ပြောလိုက်ပါပြီ။ မိုက်ခရိုဆော့ ဂူဂယ်နဲ့ အက်ပဲက မြန်မာနဲ့ အင်္ဂလိပ်ဖောင့်တွေကို ပြင်သုံး၊ ယူသုံးထားတဲ့ မြန်မာယူနီကုဒ်တွေ တွေ့မိလို့ပါ။ Arthouse က W01 ဖောင့်ကို ခပ်တည်တည်နဲ့ အမြီးတွေ ဆွဲရှည်ပြီး သုံးထားတဲ့ ဖောင့်ကိုလည်းတွေ့ပါတယ်။ ဖောင့်ဒီဇိုင်နာ နာမည်တောင် ခံလိုက်ပါသေးတယ်။ တချို့က ခရက်ဒစ်ပေးသလို တချို့ကလည်း ဗြောင်ပဲ ကူးပါတယ်။ ကော်ပီရိုက်ရှိရင် ခရက်ဒစ်ပေးလည်း မသုံးသင့်ဘူးဆိုတာ ဝေဖန်သုံးသပ်ဆင်ခြင်ပြီး ကိုယ့်လိပ်ပြာကိုယ်သိ၊ ကိုယ့်သိက္ခာကိုယ်ရှိကြဖို့ပါ။

https://www.facebook.com/groups/mmUnicode/permalink/1249682558375581/
အသတ်သည် နောက်ဆုံးမှာသိမ်းတယ်ဆိုတာ လူပြိန်းနားလည်အောင်ယေဘုယျပြောထားတာ။ နောက်တစ်ခုက ဝဆွဲနဲ့အသတ် ကပ်ရပ်သုံးထုံးမရှိပါ။ မွန်ဘာသာမှာ ဟထိုးကိုအသတ်နဲ့တွဲသုံးရင် ဟထိုးသည် ဟရဲ့အကျဉ်းချုပ်ပုံစံဖြစ်လို့ အသတ်ရဲ့ရှေ့မှာနေပါတယ်။ ရှမ်းဗျည်းတွဲ ဝ u1082 သည် သရအဖြစ်လည်းသုံးလို့ အသတ်ရှေ့မှာနေပါတယ်။ ဗျည်း နဲ့ကပ်ရပ် သရမပါဘဲ ဗျည်းတွဲယ နဲ့ အသတ်ကပ်ရပ်ဆိုရင် အသတ်ကိုရှေ့မှာနေရာချပါတယ်။ ဒါတွေအကုန် utn11 ထဲမှာ ရေးထားတယ်။ ဖတ်ပါလို့ ပြောတာ ကိုယ့်ကိုတောင် ပြန်ဖတ်ခိုင်းလိုက်သေးတယ်။ ကျွန်တော်မျိုးကြီး သေသင့်ပါတယ်။ မသိလို့မေးရင် နည်းနည်း humble ဖြစ်ဖို့တော့ကောင်းပါတယ်။ မသိလို့လည်းမေးသေး ထောင့်မကျိုးဘူးဆိုရင် သိတဲ့သူဘယ်သူမှ အဖက်လုပ်ပြီး လာဖြေမှာ မဟုတ်ဘူး။ အခုလည်း အသေးစိတ်သိချင်တဲ့လူတွေ ရှင်းအောင် လာပြောတာ။ မရှင်းရင် မာတင်ဟော့စကင်နဲ့ ယူနီကုဒ် org ကို အီးမေးပို့ပြီးသာ မေးတော့။ မကျေနပ်ရင် proposal တင်ပြီးပြင်။

· · · ◊ ◊ ◊ · · ·

Leave a Reply

*